1985 - RADIZ DE CHEN

UNA CANCION - JJ LAGRABA, Lo Cantaire 

Dibuxet, Arturo Perez Susin (Casa Vazquez de Ciresa, en do nacié yo)

 

Quiero que sepaz que viengo

con la guitarra a cantar

y a dicirvos cuatro cosas,

siquiera por no callar.

Pa empecipiar vos diría 

que esta traza de cantar 

pa dinguno ye dificil

si se i mete a prexinar

en custions que li preocupen

u en cosas de lo lugar.

Y, cuando li quede un rato,

que lo escriba... ¡y a vociar!

Y dezaga d'esto, 

lo estribillo irá:

-Quiero una canción

que aduye a amostrar

a qui nos escuite

lo nuestro fablar.

Faga goyo a todos,

solo a la mitat,

u a la cuartas parti, 

lo mesmo me da.

A qui no li'n faga...

¡no ha porqué escuitar!

Lo importante de lo asunto

no'n ye ferlo bien u mal;

ya diciba Veremundo

que, a la hora de fablar,

cada cheso ye un mayestro...

que no ensenya a los demas.

Lo qu'hemos a fer, y pronto,

que güena falta nos fa,

ye amostrar cheso en la escuela:

los críos lo salvarán.

Lo estribillo agora

sigue estando igual:

Quiero una canción 

que aduye a amostrar...

Fabla arcaica, u de museo,

bi ha qui la nos clamará,

pero bi ha que demostrarlis

que nunca se perderá.

Si antiparti defendemos 

lo que hemos en esta Val,

si nos veyen escribindo,

u nos escuitan cantar,

verán que esta ye una fabla

con la que bi ha que contar.

y repetindo estribillo

acabaré de cantar:

-Quiero una canción

que aduye a amostrar

a qui nos escuite

lo nuestro fablar.

Faga goyo a todos,

solo a la mitat,

u a la cuartas parti, 

lo mesmo me da.

A qui no li'n faga...

¡no ha porqué escuitar!

 1985 - RADIZ DE CHEN

En ixa anyada se publiqué lo primer manullo d'escritos de la 'era moderna' de lo cheso imprentau. Agún no bi heba ordenadors personals ni impresoras, ni editores de texto a lo alcance de particulars. Por ixo estié escrito a maquina y editau tal cual.

Chunto con José Perez Boli, M.Angeles Miguel Cabana y Blas antonio Perez Larripa, con dibuxez de Arturo Perez Susin, y de la mano de Pepe Lera como impulsor de la ideya. La mía contribución estié compuesta por un soneto, una canción y un remero/cuento.

 Transcribo hoy lo Soneto, a lo que plegué a meterli mosica. Y remerando ixa melodía estos zagueros dias, he caíu en la cuenta de que no heba  rechistro de la letra por dingún puesto. Hasta que he remerau que yera publicau en ixe libret.

SONETO A LA CONCENCIA 

A pur d'escuitar lo tuyo lamento

-que fa ya un munton d'anyadas escuito-

querería dicirte por escrito

lo que, bellas bagadas, por tú sinto.

Prexino que m'en ganyas y al momento,

las ideyas, en tropel d'exercito,

regüelven contra tú y, anque contrito,

no bi ha qui las arranque d'astí dentro.

No se como clamarte, lo te churo,

pos si portiarte dentro ye tan duro,

no pues estar la voz de la experiencia.

Y, si anque m'aime, no puedo ligarte,

pos no so yo mas que qui ha que carriarte,

como otras chens te i clamaré: CONCENCIA

Ne yera recopilando 'ocurrencias' escritas dende fa tiempos y m'he trovau esta cosa, désta guisa:

 

 

ERASE UN HOMBRE A UN SMARTPHONE PEGADO

ERASE UNA WIFI SUPERLATIVA

ERASE UNA MUJER SUPERLASCIVA

CON EL ESPIRITU EN EL CHAT COLGADO.

 

ERASE UN BADOO SUPERDESBORDADO

DE PERFILES Y DE MUJERES VIVAS

LLENO DE FOTOS QUE LAS VUELVEN DIVAS

ERASE UN TONTO SIEMPRE EMPAJILLADO.

 

ERASE QU’ERAN TODOS  MENTIROSOS

ERASE UNPERFIL LLENO DE MENTIRAS

ERASE UN MUNDO LLENO DE TRAMPOSOS

 

ERASE UN CARGADOR DE BATERIAS

LA TABLET, LA SD, LOS OJOS ROJOS...

LAS YEMAS DE LOS DEDOS...¡PORQUERIAS!

Refitoliando por la ret, m'he trobau esta canta que ditz:

"Que bien se siega en la Arbesa

a la raya de lo sol

pero cuando a nuey se zarre

mellor se estará en a mesa"

 Anyaden que: 

"Estilo -la música- compuesto por José Rodrigo Gabarre, lo canta a dúo con su hija Ana Esther, ambos componentes de La Agrupación Folklórica Santa Cecilia, de Huesca."

Bi ha bel un que otri video con la misma canta, en do se respetan con pelos y sinyals la letra y lo estilo.

Ye pro claro que se'n tracta d'una copla chesa, igual por lo toponimo 'Arbesa', que por lo sustantivo 'nuey' (nueit), la esprisión 'a la raya de lo sol' (raya raya de lo sol) u lo verbo zarrar y lo articlo masculino "lo"

Lo alverbio 'mellor' y lo articlo femenino en "a mesa" son claramente formas ampradas de otra variedat, prexino que ansotano, u de bel otri costau.

No he sabiu trobar l'orixen de la copla, que de siguro brinqué de lo lugar en fuera de la mano (de lo peito, millor) de bel trasuante u caixalicano en tiempos pasaus. Por ixo, en lo suyo honor, yo querería reivindicar dende estas línias que ixa copla habría qu'estar asinas:

QUE BIEN SE SIEGA EN L'ARBESA

RAYA RAYA DE LO SOL

PERO EN QUE LA NUEIT SE ZARRE

MILLOR S'ESTARA EN LA MESA

Este articlo (y los que vendran dezaga), sigue la Propuesta Ortografica de lo Estudio de Filología Aragonesa, seguntes se puede viyer astí:

http://www.academiadelaragones.org/biblio/EDACAR7_2.pdf

 

 

Dende lo 31 de marzo de 2014 sinde mover un dite en este bloc.

Perdiu en la nueit de los tiempos, 

igual que la clau que da paso a la escritura,

abandonaus en la 'nuble' los mios poemas,

las mias ocurrencias que allora escribiba, en 2011.

Y aguardando la riada que i plega.

PRIMAVERA

(Lo Cantaire, 30/03/2014)

Pue’star que asinas rezasen

los que paseron la guerra...

qu’n ixos tiempos d’allora

se viviba de la tierra.

Lugo habié muitos triballos,

anque... de la Val en fuera,

que t’astí solo han plegau....

lo turismo y... ¡la hipoteca!:

“No tarde muito, Siñora,

en plegar enta Ciresa,

no se rezague, por Dios,

que ya hemos las camas feitas,

con los leitos esponchaus,

bien limpias las pozaleras

y las cambras bien horiadas

de maitins, con la ciercera...

Que ya’n ye lo fogaril

calentau por la foguera

y cuelga en lo canaril,

encima d’una baguera

la caserola bullindo

que ya he pelau patatetas

y ye feito lo sofrito

y he tallau bellas miguetas...

Que ya hemos cremau las marguins,

ya hemos desbrozau las cequias,

lo granero ib’ye desento

y ya hemos labrau las güebras,

y estas carazas de marzo...

¡no nos dixan fer las huertas!

No tarde muito, Siñora:

¡Vienga ascape, Primavera!...

Que ya paguemos la Bula,

hemos lasa la despensa,

acotolau ye lo prenso

y hemos cremau muita lenya.

Ya i n’ha pro de sabanyons

por culpa de tanta xera...

¿Alcaso no ye la hora

de que plegue Primavera?”

COPLAS A LA MUERTE DE MAMÁ

COPLAS A LA MUERTE DE MAMÁ
Lo cantaire (noviembre 2011)

Ya li’n dirás a Papá,
que los ueito con tú estiemos,
y pon que t’abandonemos,
y sinde viernos plorar
hasta que te nos ne fues...

Li dices, tamien, dimpués,
qu’hez a fernos bel huequet,
anque siga chiquetet,
en la casa que i-serez
hasta que nos encontremos

ya que... lugo plegaremos
y, entremistanto ixo pasa,
vos cudiaremos la casa
en do los ueito veniemos
enta esti mundo tan curto...

Cuasi que a todos lis furto
La ilusión de remerarte
pos yo me atrivié a furtarte
la zaguera foto, un furto,
que agora lis fo plegar...

Si son fartos de plorar,
igual han los uellos xutos
y en unos poquez minutos
lis ne torno a remullar...
Yo i-so en que perdonarán...

(puede estar que se contine... u no)

L’ACTA DE L’ASAMBLEA

Ye plegau lo diya ixe:
S’achunté una cuarentena
de los socios de “La Borda”
y, antiparte otra quincena
ibieran representaus
a traviés de papeletas...

Empecipia la sesión
de la clamada “asamblea”
con una salutación
que nos fa la presidenta.
Y, lugo, los cinco puntos
de lo diya... ¡que s’apreban!

S’ha eslexíu la nueva Chunta,
que yera lo que quereban
los de la chunta salient,
y d’esta guisa se queda:

Luis Miguel y Chuan Chusé
dentran por “la Edá de Piedra”
Corina y David los siguen
porque son de “la Edá Meya”
y, por la Contemporania,
lo pardal de Labordeta
y lo chiquet de Lorrey,
que Adrián y Berto se mentan.

En los ruegos y preguntas
se da una cumplida cuenta
de las demandas que trayen
los mas chiquetz de l’aldea:
excursions enta lo mon,
carreras de bicicletas,
bels chugos pa lo salón
(pa cuando lo frío pela...),
un puesto pa lo balón
y, d’escalada...¿una escuela?

Si no lis ne concedemos
que vienga Dios y lo i veya,
que lo qu’ellos nos demandan,
no cuesta cuatro pecetas...


S’acabé la reunión
pasadas las doce y meya;
se devanté la sesión,
nos itemos unas bieras...
y a comentar la chugada:
Si La Borda se renueva,
seguirá “dinamizando”
la sociedá de Ciresa
(y no pas “dinamitando”
que antisdayer pareceba...)

Los “lecos de sociedá”
que en estas linias se mentan
lis ne faremos plegar
a los que i son d’astí en fuera
y lis agana saber
lo que acontece en Ciresa.
Que, ni en “Hola” ni en “Semana”,
lo que astí se diz, lis cuentan..
(Lo mainate de Navarro,
lugo amanez que se quexa,
y diz que los veraniants,
cuando de verano i plegan
han a menester saber
¡LO QUÉ PASA... Y EN QUÉ QUEDA!)
(Lo cantaire, 24/07/2011)

BANDO

A lo que pasa lo hibierno
y plega la primavera,
u a primeras de verano,
siga de dentro u de fuera,
amanez bel toli-toli
que la sangre nos altera.
En lo banco Berdolé,
lo puen de la “Riguadera”,
en los hotals, en las faxas,
dende casa d’Apizuela
enta la casa Antonico,
y ta la de Catarecha,
anque siga en son de paz,
semblan los aires… ¡de guerra!

En los lugars chicotons
¿nos aima la escandalera?
¡Ya n’hemos otra en “La Borda”!
Ya hemos a la presidenta
y a bel otri de la chunta
mirando de fer las cuentas
y tocando a chenerala
pa que se faiga asamblea
que, por dexadez, fa tiempos
que no se’n ha feito brenca.

Parez que torna a salir
Lo que ye viello angulema:
Que qui triballa, se cansa.
Y qui no, ni se’n entera.
Pa que sabaz lo que pasa,
Juana lo nos contará.
Acudir enta “La Borda”
de nueis, a las diz y meya
de lo diya ventitrés
¡Y A MIRAR ESTO EN QUÉ QUEDA…!

15 M

A DESALOJAR
Recopilación: Juanjo Lagraba

Estribillo.
A DESALAMBRAR, A DESALOJAR
LA GENTE ACAMPADA EN LA PLAZA EL PILAR
A DESALOJAR, A DESALAMBRAR
PLAZA CATALUÑA Y LA PUERTA DEL SOL

Letra1
YA ESTAN HARTOS, INDIGNADOS, YA NO PUEDEN CALLAR MAS
EN LA TIENDA DE CAMPAÑA SE REFUGIAN A PENSAR
PIDEN EL QUINCE DE MAYO: DEMOCRACIA REAL ¡YA!
DE SU PUÑO SALEN FRASES QUE TE HACEN REFLEXIONAR:

Letra2
SI NO ME DEJAS SOÑAR, NO TE DEJARÉ DORMIR
NO HAY PAN PA TANTO CHORIZO, FUERA SUELDOS VITALICIOS
TODOS SOIS EL ENEMIGO,
YO VIVO EN UN ZULO, POR ESO DOY POR CULO

Letra 3
A MI, ME DAS MENOS, Y MÁS A BANCA Y CLERO.
SIN PAN, NO HABRÁ PAZ. JUSTA LEY ELECTORAL.
SOMOS DEMASIADO JÓVENES, NO PODEMOS ESPERAR
NO SOMOS MERCANCÍAS. SOMOS REBELDES SIN CASA.

Letra 4
LA REVOLUCIÓN NO SERÁ TELEVISADA
LA VOZ ES NUESTRA ARMA: DERECHO A REUNIÓN SIN AUTORIZACIÓN
NUESTROS SUEÑOS NO CABEN EN TUS URNAS
NO ES UNA DEMOCRACIA, ESTO ES UNA ESTAFA.
¡DECLARAMOS ILEGAL LA LEY ELECTORAL!

Letra5
MANOS ARRIBA: ¡ESTO ES UN CONTRATO!
VIOLENCIA ES TENER QUE TRABAJAR
DOCE HORAS CADA DIA PA MANTENER EL SISTEMA
MUCHOS AÑOS ENGAÑANDO Y YA NOS HEMOS CANSADO.

Letra 6
NO TENEMOS CASA, NOS QUEDAMOS EN LA PLAZA
PIENSO, LUEGO ESTORBO: LA DEMOCRACIA ES UNA LUCHA DIARIA.
NO QUEREMOS CARA A, NI QUEREMOS CARA B: QUEREMOS CAMBIAR DE DISCO
SE ALQUILA ESCLAVO ECONÓMICO. SIN VIVIENDA NO HAY VIVIENDO.
ESTADO DEL MALESTAR: NO ESTAMOS CONTRA EL SISTEMA:
SÓLO QUEREMOS CAMBIARLO

Victor Jara
YO PREGUNTO A LOS PRESENTES SI NO SE HAN PUESTO A PENSAR
QUE ESTA TIERRA ES DE NOSOTROS Y NO DEL QUE TENGA MAS
ME PREGUNTO SI EN LA TIERRA NUNCA HABRÁ PENSADO USTED
QUE SI LAS MANOS SON NUESTRAS, ES NUESTRO LO QUE NOS DEN
A DESALAMBRAR A DESALAMBRAR QUE LA TIERRA ES NUESTRA ES TUYA Y DE AQUEL, DE PEDRO, MARÍA, DE JUAN Y JOSÉ... Estribillo
©Lo cantaire-mayo 2011-

La "caló"

LA CALANDRIA

En Ciresa, lo día 3 de chulio de 2010. ©-Lo Cantaire de l'aldea.

L’algarabía que montan
picarazas y boletas,
cardelinas y gurrions
antimas de calandretas(1)
-como lis dicen en Graus-
removiendo cereceras,
chiflando en los sabuquers,
tociando con patateras
u picotiando en los sulcos
de las faxas, u en la glera;
que dende casa se sinten,
como si en la pozalera
fuesen, fendo zaragata,
como a la hora de la siesta.
Ni agún metiendo la radio
me se’n ven de la cabeza:
No puedo estar en la cama.
Me devanto. Siete y meya.

En lo güerto de Coterri,
anque no quedan cerezas,
(ciresas diz que las claman,
en variants aragonesas
que charran en otras vals
d’esta misma cordillera),
hasta los cuervos acuden,
brilando las alas negras
cuando amanece lo sol,
baxando por la cantera,
y en la terraza me i-troba
garabatiando estas letras.

Esta añada ye lo PIR
-bien cargau de mosiquetas-
en Echo, porque li toca.
Tasament los de Ciresa
bi-son apagando brasas
de lo qu’estieron fogueras
en la fiesta de San Pedro,
con migas y costilletas.

Ye lo PIR d’Echo, diciba,
pero NO de la Val Chesa;
que a los d’Embún y d’Urdués,
igual que a los de Ciresa,
branca lis han programau
pa fer por ixas carreras.
Y, qui quiera vier lo PIR...
que pille la carretera,
que güen meyo n’han, si no,
de vier como gastan perras
de la comarca de Chaca,
u de la provincia entera...
Ixo, sin contar los cuartos
de devantar las carreras,
entantonicar las plazas,
meter losas en las ceras
y de itar asfalto nuevo
en toda la carretera...
¡menos mal que ye la “villa”...
y las otras son aldeas!

Que baxen y puyen autos,
que acuda la chent de fuera,
y disfruten d’estos monts.
De lo lugar, los que puedan,
que brinquen enta ixas playas,
a vier que cría l’arena...
y tornen enta la val
con las pilas cargadetas,
pa plantar cara a lo hibierno...
y plegar ta primavera.

Y qui no haiga presupuesto
pa brincar enta difuera,
que disfrute de la val,
que lugo serán las fiestas.
Entre tanto, en ixos campos,
bi-ha que replegar las yerbas;
puyar las vacas ta puerto,
baxar usons –si se dexan-;
ta Peñaforca las crabas,
ta Lenito las ovellas...
Amonico, sinde prisas,
no siga la canta cierta:

“De la collada Miqueu,
ta la clamada Ondaederra,
pue que te cante lo peito
indo enta ta Calatuberza” (2)
(ye Galatuerza en Ciresa...)

En fin, ¡qué l’imos a fer!
otro verano que i-plega.
Que no falte la calor
y que se siga tan luenga
como lo frio d’hibierno...
que de gufaña nos plegan...

(1)-calandretas claman en Graus a las alondras. Me pienso que ye igual que calandria, nombre común que li se da a diferents "paseriformes", de lomera parda y peito esclaracíu, antimás d'una mancha escura en cada canto de lo cuello. En lo sur de Francia clama calandreta a las escuelas en do s'amuestran las fablas locals gasconas y occitanas, como las "ikastolas" vascas.

(2)-Canta replegada de Felipe lo Piquero (Felipe Miguel, de lo Bar Acher, ex-alcalde lo concello cheso).

LAS RONDAS DE CIRESA...

La foto de la dreita ye d'una ronda que faciemos con lo grupo Val d'Echo por lo lugar de Enate (¡y qué vino nos dieron!)


Plega San Blas, y han programau ronda de mozos. Por si se plegase a fer (dificil, faltan tañedors) he preparau bellas coplas (las que ven en negrilla y cursiva, son d'orixen popular, no son d'esti Cantaire):

COPLAS DE RONDA – SAN BLAS 2010
Ciresa, Febrero 2006 (Lo Cantaire)

CARNAVAL QUE NO SE’N ISE
Y SAN BLAS QUE SE’N TORNASE
QUINCE DÍAS QUE PLEVESE
Y OTROS QUINCE QUE NEVASE.
¡GÜENA VIDA, SI DURASE...!

LA FILLA MAYOR DE CONCHI...
HA LA CABEZA TAN DURA
QUE HA BRINCAU TA BARCELONA
A ESTUDIAR ARQUITECTURA

Y RAQUEL, QUE NO YE FATA,
TAN PRONTO SE FACIÉ MOZA,
PILLÉ LAS DE VILLADIEGO...
Y A ESTUDIAR TA ZARAGOZA.

Y NIEVES AGÚN YE EN CASA,
QUE PA IXO YE LA CHIQUETA...
ANQUE YA TIRA LO HIPO
A LOS ZAGALS DE CIRESA.

SI MIGUEL TOCA LO SAXO
JUANA Y CACHITO, LO ESCUITAN;
Y LA VIRXEN DE LO PUEYO
SE FA LA SORDA EN LA ERMITA.

TODO LO DÍA DEZAGA
DE LO CRÍO DE ANGELITO,
NO’N PARAN EN CASA POLI
NI LA GÜELA NI LOS TÍOS.

BIENPLEGAUS DE BARCELONA
A VIVIR ENTA CIRESA:
CUDIAR QUE IXA CACHIMALLA
APRENDA LA FABLA CHESA.

LO CASAL POR LO PALLAR,
FACIÉ PERMUTA APIZUELA,
Y FARDA DE DOS MULLERS:
QUE ANITA YA YE MOZUELA.

LA CASA “LOS DE LO REY”
CON LOS “CONDES DE NAVARRO”
IMPLEN D’ALCURNIA “L’ALDEA”:
¡QUE SE BAXEN UN GÜEN TRAGO!

LOURDES ENTA LO CHALÉ...,
QUE SI LA CASA RURAL...
¡NO T’ESTRAÑEN LOS PIROPOS
QUE TE ZAMPE BEL PARDAL!
¡Y BAXANOS UN TRAGUET!

SINDE ESTAR POR ESTE VERSO
SARA Y CELIA SON CONTENTAS.
QUE SUS PADRIS S’HAN MERCAU
UN “VERSO” CON CUATRO RUEDAS.

TA LA ESQUINA MARIAJUANA
LA RONDA PLEGA CHELADA:
TAN CARO QUE NO ACOMBOYEN
A LA CHEN QUE M’ACOMPAÑA.

ESTA YE LA VERDADERA
CASA “LO REY” DE CIRESA;
AGUARDARDAMOS A QUE CANTE
CONCHITA, QUE YE LA REINA.

EN LA PUERTA CEREZAL
(AGORA DE CATARECHA)
RODIAMOS LO BARRIO BAXO
¡QUE NOS ATIENDA LA DUEÑA!

SI QUIERS, VIENETE’N CON MÍ,
TA LOS CUELLOS DE LENITO,
A CHINTAR TA LA RECLUSA
Y A DORMIR TA LO FAÍTO.

TRES CHENERACIÓNS S’ACHUNTAN
EN CASA DE BERDOLÉ:
CARMENCITA, LAURA Y SANDRA:
Y A TRES HOMBRES, TRES MULLÉS.

DE BOYERO U PICADOR
U A DESTAJO FENDO LEÑA
DAVID S’HA FEITO LA CASA:
¡CUASI NO QUEDA HIPOTECA!

D’ESTE BAR, TA CASA FIMIA,
VICENTE SE LEVÉ A NORA
Y LO D’URDUÉS QUE VOS CANTA
IZ QUE SI HA TROVAU LA “GLORIA”

DIZ “KUKÉ”, DE MARIGLORIA,
QUE LIS TOCA FER D’HORRERAS:
NO SABEN TA DO ACUDIR:
¿TA LO CHARCO U TA L’ALDEA?

¡CHUCHES, REFRESCOS, ADORNOS...!
¡SIÑOR, LÉVESE UN REMERO,
QUE MARIAJOSÉ EN LA TIENDA
LI’N DA POR POCO DINERO...!

BRUN, BERNAT Y HASTA LAGRAVA
TRIVALLERON D’ESCUDEROS
PA LO SIÑOR CARLOMAGNO...
¡Y EN CIRESA SE QUEDERON!

LI DICE DOMINGO A EVA:
¡CUANTOS ACHAQUES, MULLER...!
-¡HABER PASAU LA ITV,
SI NO TE PAREZCO BIEN...!

POR LA PLACETA CHAMBRÚN
YA NO ACUCUTA BLASITO:
A RONDAR TA LABORDETA;
SORIA QUE SAQUE PESTIÑOS,
Y LO VINO, DE LUISITO.

TERE CONTANDOLIS CUENTOS
A CRÍOS DE LO LUGAR...
Y ARANCHA PINTANDO CUADROS:
¡L’ARTE L’HAN A REBOSAR!

AGUARDAMOS QUE AMILLORE
LA DUEÑA DE MARTINICO
CON LOS CARIÑOS DE PACO
Y DE AVELINA, Y DE QUICO.

JOSE LUIS YE LO TIÓN;
PADRE Y FILLO, RAFAELS
DOLORES, CHARO U MARÍA,
NOS BAXARÁN DE BEBER.

NOS BAXARÁ BEL AVÍO
DOLORINES D’ESCURÉ
SI HA VENÍU LA SUYA FILLA,
NOS ACOMBOYARÁ BIEN.
CORTADA CON LA ESTRALETA
BAXA GONZALO LA MAGRA
PA QUE TARDEN EN CLUXIRLA
Y ASINAS... ITAR MAS CANTAS.

RAMÓN Y MERCHE, CONTENTOS,
DE GUAPA QUE YE NATALIA.
ANQUE HAN UN FITIPALDI
QUE P’AVENTURAS NO’N GANA.

LA CHOVEN DE LO FERRERO
CHESO Y PATUÉS LIS AMUESTRA
A LAS DOS FILLAS TAN GUAPAS
QUE LUGO SERÁN MOCETAS.

EN ECHO, CIRESA U CHACA
¡QUÉ FELIZ CHUGA MIGUEL!
Y AITANA NO PIERDE COMBA:
L’ALEGRÍA DE RAQUEL

QUE NO SE QUEDE MARRACO
SINDE COPLA DE SAN BLAS
QUE YE FIESTERO Y LI AGANA
IR A BAILAR CON PILAR.

TRES CHENERACIÓNS S’ACHUNTAN
EN CASA DE BERDOLÉ:
CARMENCITA, LAURA Y SANDRA:
Y A TRES HOMBRES, TRES MULLÉS.

ADIÓS VAL DE LA RECLUSA,

ADIÓS FOBIA CAMELAR,

ADIÓS CIRESA DE L’ALMA,

NUNCA TE PODRÉ OLVIDAR.

EXPOSICION ACUARELAS JAVIER MARTÍ

MUSEO DE ARTE CONTEMPORANEO

"Pallar d´Agustín" (Echo)

Del 1 al 8 de Agosto:

"PINTURA Y TEMAS DEL VALLE DE HECHO"

Artista: JAVIER MARTÍ IBARZ


Como amigo y compañero, li adedico unas ringleras:

Se quexaba Veremundo:

“chamineras ya no’n queda...”
¡qué razón heba aquel hombre...
y cuánto duelo li feba!

Regolviendo en internet,
en libros y enciclopedias,
esti diaple de Navarro
n’ha trováu una rabañera.

Se i-clamaJavier Martí
y ha lo acomodo en Ciresa
(su güelo, “lo requeté”
la casa Navarro heba)

Ye chubiláu... de por vida,
que ya lo se mereceba:
dedicáu ta l’amostranza
s’ha pasáu la vida entera.

Leva cuasi trenta añadas
de bandurria de primera
en lo grupo la val d’Echo
pos, la mosica, le preva...

Li agana, igual, la pintura,
sobre todo, l’acuarela;
qu’enchunca menos las manos
a la hora de fer las mezclas

Pa que se i-fesen mas curtos
lo ivierno y la primavera
se proponié aproveitarlos
triballando una miqueta

Se facié con güen amiro
de pincels y d’acuarelas
y empecipié a dibuxar,
implindo tardis y veilas.
Rodiáu de fotos antiguas
de portals y chamineras,
y animáu por la muller
(asinas no entorpeceba,
que diz que los chubiláus
solen tornarse algo pelmas),
y asinas,poqué a poquet
n’ha pintáu una cincuentena

Y los fillos li dicieron,
al vier lo políus que yeran,
que bien podría levarlos
a esponer ta la val chesa.

Se sintié en l’Ayuntamiento,
un maitín de primavera
(charraba lo concellero
con chen organizadera):

“Mira, que i-clama un siñor
que diz que quiere esponer
en lo pallar d’Agustín:
¡prexino lo fará bien!...”

Agora podez vier
que mereceba la pena;
por la parti que me toca...
li dedico estas ringleras.

Gracias Javier por lo esfuerzo
que has feito por la val chesa,
no dixando que se olviden
ni portals... ni chamineras.


Lo cantaire de Ciresa
J.J.Lagraba, julio 2008

LO PRIMER PILAR

-¿Dónde estabas?...¿de dónde sales?.

Los güellos li se’n saliban de los cuencos, de ponchos que los levaba, ruxos por lo enfado. Corrucada la cara, blanca como la lei, varillas desencaxadas que dixaban vier caxals mal acotraciáus en ixa boca.

Yera un flaire cuarentón, alto y xuto, de luenga nariz y despexada fren. La capucha negra li colgaba torcida por dezaga de los güembros, dixando columbrar una miqueta de chepa, no’n sabo si produto d’añadas d’estudio, u de las horas diarias que adedicaba a chugar en lo frontón.

Un crucifixo colgaba d’una floxa sogueta que li rodiaba la cintura, soxetando lo sayo que li baxaba enta las espardeñas, dixando vier rematanzas de embercadas unglas, como levando lustros sinde retallar.

Tásamen levaba interno mes y meyo en ixa escuela de Zaragoza y agún li costaba muito charrar lo “castejano”. Heba qu’estar de contino prexinando cómo lo diría lo mayestro de la escuela de lo suyo lugar, que yera cuasi l’unico a qui l’heba sintíu charrar... Siguiba prexinando cómo diaples esplicotiarli lo que li heba acontecíu...

Todo heba empecipiáu de maitíns, ixe día de lo Pilar de 1966. Feba güaire que li heban prebáu la voz en la escolanía. No lis parecié qu’hese mala orella, y como heba voz de cardelina, lo metieron con los tiples. Entre las cuatro voces feban una ventena guallarda. Ensayaban un par de bagadas cada diya y ya se sabeban la misa de memoria.

Yera lo diya d’estrenarse en la capilla d’un hospital que los heba convidáu a cantar la misa. Como premio, lugo los levarían enta las ferias, que bi-yeran en lo barrio de Torrero.

Los acomboyeron con güen almuerzo (de cómo estié la misa, no se’n remera) y los leveron ta do yera prometíu. No heba sintíu nunca tanta chilarita, tanto roído, ni heba visto tanta chen chunta. Lo maitín se’n fue en un volito... No’n sabeba uno enta do mirar, en do montarse, sinde parar d’arrier y goyar d’ixe momento. Por volar, hasta voleron las poquetas pecetas que levaban en la pocha.

Lo flaire li demandé la encomienda de clamar a todos pa que tornasen enta l’autobús. En un volito, yeran avisáus pero, por si belún compaire d’escolanía s’hese quedáu sinde avisar, dié otra golteta por las ferias.

Cuando plegué enta do ibi-era l’autobús... ¡búscate auto! ¡Ni rastro d’él!

Prexiné lo que su güelo hese soltáu en parellana cercustancia. De siguro habría estáu tal que: ¡Cagüen sos!.. ¡Cagon diola!... pero a él, no li saliba ni mu. Aparti de que, en lo curto tiempo que levaba con los flaires, li heban amostráu que, anque venials, ixas esprisións yeran pecáus... No yera custión de, amás, haber a menester pasar por lo confesonario.

Atamás d’ixas curtas reflesións, no se solucionaba lo problema. Asinas que, a patiar carreras por Zaragoza, en busca de la estación d’Agreda.

El sabeba que d’astí saliba lo trasporte ta do yera la escuela. Y tamién sabeba que valeba dos pecetas lo badaje, anque no heba otri equipe que la pocha pía... y gana, ¡muita gana!, que s’heba feito meya tardi dando güeltas y sinde minchar branca.

Trobé la estación. Solo yera custión de trovar las dos pecetas que yeran a menester.

¿Demandarli’n a la chen? ¡Ah, claro...! Ixo ni plantiarlose.

Prexiné que, habindo tanta chen de paso por astí, no sería raro que bi n’hese bella por entierra...

Con tan güena suerte que, a lo poco d’estar esgollarriando como un can, trové la primera peceta (¡aleluya! l’habrían feito dicir los flaires). Contando con que lo güen fado continase, siguié dando güeltas y más güeltas por toda ixa redolada.

No bi-heba can de cazataire que buscase con mas angunia... pero todo estié de baldes. Se facié otrora y, farto de revolotiar, plegué ta la conclusión de que ixa no yera la solución. Allora, ¿qué feba?.

La tardi correba cuasi tanto como las tripetas plenas d’aire. Y, como diz que la fambre dispierta la sesera, de repente trové la solución: Pillar un tasi. Lo levé ta lo destino. ¡Qué fácil li parecié dimpués de vierse a cubierto! (Aquel trimestre no podié prebar un dulce, ¡güen meyo n’heba!)

Ixe pobret de flaire no parez que lo estase pasando millor de lo qu’heba pasáu él.

Escuité sinde tartir l’aventura que li acababa de contar (ni s’heban apercazáu de que faltaba).

No dicié ni mu... Ni demandé perdón... Ni li’n dicié a dingún otri responsable...

Li pasé un brazo por lo güembro, a mutis, lo levé enta la cocina, li dié de brendar. Se sintiba la chilarita de lo patio de recreo...

Agún plegué a tiempo de chugar un ratet entre que se feba la hora de cenar. Ixa nuey dormié tranquilet...

Soneto a los Usóns

U(n)SÓN(eto)

YA PLEGA SAN CHORCHE, YA YE PRIMAVERA.
HA PLEVÍU LO SUYO Y FA GÜEN TEMPERO.
YA IBI-É L’ABRIGALLO GUARDÁU EN LO ROPERO.
YA PLEGAN LOS AUTOS DE LA VAL EN FUERA.

PATAQUÍAN BORDAS, PATAQUÍAN SERAS,
SANTANA Y RECLUSA QUEDAN DE ZAGUERO,
PUYALS Y PARDINAS REGÜELVEN PRIMERO,
RETABILLO EN MANO, REMUEVEN XARGUERAS.

A MOSTAS A MOSTAS, LO MON YE SINCERO:
SI SABES LO CADO, USONS TE VE DANDO;
Y SI NO TE’N SABES... YA SALDRÁN EN PUERTO.

YE MERCADURÍA QUE NO SALE EN GÜERTO;
A PUR DE FER VIAXES Y D’IR CAMINANDO
IMPLIRÁS L’ALFORCHA... SI PLEGAS PRIMERO.

LA MÍA MAI (2)

En esti poema, la rima se'n ye tresbatida. Agana más lo que diz, que la forma de dicirlo.

PENSAMIENTOS (PREXINALLOS)
(Concepción Miguel Cabana. Ciresa, agosto 2007)

Agora me fa pensar,
ya qu’he muito tiempo libre,
las güeltas que da la vida.
las casas, que yeran plenas,
se’n son quedando vacías.
Esto lo sabe cualquiera
pero no’n ye igual de dentro,
que viyerlo dende fuera.
Algunos que ven marchando
yY otros tantos que ne i-plega
con un ángel de la guarda
y una choina en la mochila,
pero siempre s’ha dicir
que ye la ley de la vida.
M’he metíu una mica triste
con estas idas/venidas,
pero no me fagaz causo...
que se me’n ve de seguida.
No he pretendíu con esto
fer dinguna obra de gracia,
pero me sale de dentro
y, anque siga mal escrito,
me quedo tranquila... ¡y basta!
Lo mundo sen torna loco
y todo marcha a l’revés.
los gatos comen pepinos;
los xabalíns, por las faxas,
se comen las esquerolas
y los grumos de las cols.
Por unos puestos, sequías,
por otris, inundacións;
bel que otri terremoto,
crimenes todos los diyas.
Y encima, los talibáns
nos están amenazando
con tornarse ta esta tierra
y fese’n ellos los amos.
Creigo que Dios ye enfadáu
porque rezamos muy poco
y no femos los deberes
que nos mandé dende antaño
y femos maldito causo.
M’aganaría fer algo,
pero so tan poca cosa...
que lo que no facié antis,
agora pior, a mis años.

LA MÍA MAI (1)

Dimpués d'haber los setenta cumplíus, la mía madri s'ha atrivíu a escriboniar en cheso. En esti primer poema charra de los vecinos que se'n son íus, asinas como la suya mai (mi güela) y lo suyo hombre (mi padri). Como siempre l'ha aganáu cantar coplas de jota (se'n sabe a catorcéns), la rima no podeba estar otra. Astí l'hez:

LO BARRIO
(Concepción Miguel Cabana. Ciresa, agosto 2007)


Adiós li digo a Carmeta,
con lo mío corazón,
porque yera en esti barrio
como una istitución.

A Carmen de Feliciana
y a Santos, lis vo a dicir:
que me aguarden en do i-sigan,
que lugo me toca a mí...

A Minguitos y a mi madri,
que salieron d’esta casa:
que no los olvido nunca,
por muitos años que faga.

A los demás familiás,
que todos se’n fueron chovens:
lis rezo todos los diyas
y lis do las mías flores.

Hoy, nada más devantarme,
m’ha veníu la ispiración
de rezar por los que faltan
con esta pobre oración.

Antis de meter la tele,
que solo cuenta desgracias,
vo desayunar en paz...
y me’n vo a plegar patatas.

He prexináu en estas cosas,
pero con aires de jota,
que pa mí ye meya vida...
anque lo fuelle s’agota.

(Toda esta perorata
heba a ir enta un caxón...
pero l’han visto los fillos
y m’han cambiáu la opinión).

LA RONDA DE LO CANTAIRE

Esti manullo de coplas, presentadas ta lo concurso de coplas en aragonés, de l'Ayuntamiento de Zaragoza, ha recibíu lo sigundo premio ta lo conchunto de coplas, y lo primer premio ta la copla ganadora (testo azul).

La foto, ye de lo grupo Val d'Echo, fendo ronda en lo lugar de Enate, en lo ivierno de 2005.

LA RONDA DE LO CANTAIRE

CALA FUNDO EN LO CAXÓN
LO QUE T’HAYAS A ESCUSAR,
TIÉN LA CLÁU EN LO POCHÓN,
QUE LO INVIERNO HA QUE PLEGAR.
(Y HABRÁS QUE MERCAR TURRÓN)

YA SE’N YE PASÁU LO FRÍO,
DIMPUÉS D’ACABAR LO INVIERNO.
DE RIADAS Y PEDRISCOS...
¡SE’N OCUPE LO GUBIERNO!
(QUE’N LO CAMPO I-SOMOS PÍOS)

DINGÚN SABE CÓMO HA ESTÁU,
HA PLEGÁU LA PRIMAVERA;
POR LOS HORTÁLS Y LOS PRÁUS
LOS VIELLOS SON... ¡DE PRIMERA!
(SI LO SOL NO IBI-É CLIXÁU)

MANIETAS DE MULLER,
DIZ TU PAI QUE TE’N GASTABAS;
EL NO PODEBA SABER
QUE’N YERA YO A QUI AGUARDABAS.
(ANGUNIADA DE QUERER)

M’AGANA MUITO CANTARTE:
¡QUÉ VEROYA YES, MOCETA!
QUE I-SABAS QUE VO A POR TÚ...
CUANDO ESCUITES LA COPLETA.

PA CELEBRAR BIEN LA “EXPO”
SON A MENESTER TRES COSAS:
HABER PERRAS, HABER FIESTA...
¡Y BAXAR TA ZARAGOZA!.

SEGUNDO VERSO, PRIMERO,
SEGUNDO, TERCERO Y CUARTO,
CUARTO Y PRIMERO REMATAN
LA COPLA QUE I-SÓ CANTANDO.

QUE NO BI-HÁ RONDA SIN COPLAS,
NI COPLAS SIN DE ALEGRÍA;
REMATO CON LA ZAGUERA...

¡Y VOS DO LA DESPIDIDA!

LO MELICO

Diz que si serán farutes
los que todo saben fer,
y no de cualisquier mena,
que siempre han qu’estar primés,
y presumen d'estar chesos,
seguntes podez vier:

Ibié la millor “planchista”
de gorgueras de muller,
y las millós texedoras
de peducos pa los piés.

Han los millós tañedós
de gaitas, u de fierrez,
de guitarros y mandurrias,
d’acordións u de almidez,
lo caso ye fer roído,
dende Ciresa enta Urdués;
pa ixo se inventé la ronda,...
¡porque yera a menester!

Ibié la millor poeta,
que igual fabla con abez
u fa trinar paxaricos
que li endulzan lo quefer,
que fa escribir a la Virxen
lo que l’aima a ella meter,
u fa que las rosas ploren,
que los mons li dixen vier
lo que ha qu’escribir en cheso
pa darnos goyo al lier.

Cudian que la suya fabla
siga, de l’Aragonés,
la que millor se mantienga
viva, sinde perecer;
y, si fa falta, se i-meten
academicos de lenguas,
estudiosos de quefés,
de toponimos, de rutas,
garabatían papéls,
fendo libros, u revistas,
sacando peito al saber
que s’escuita lo que dicen
y, lo que fan, lo fan bien.

Polida val de farutes,
en do hasta los ganadés,
han las millós suvencións
y crían millós cordés.
U s’achuntan, defendindo
que lo suyo caucarré
no lis ne se leve l’onso
por la pasada Amuller

Ibié lo millor boyero
d’entre todos, cualisquier,
que, galopando por puerto
dinguno pierde lo pié;
pa ixo, si ven por lo bosque,
por pardinas y benqués;
(y mira que i-son de matas
que no i-trobas los sendés),
igual cudian los abríos,
que a los corzos fan correr.

A la vez son cazataires
de cabeza ta los piés;
lis agana contar siempre,
de xabalíns, más de diez.

Hemos los millós “paletas”,
fan casas a tutiplé
con chamineras y peñas
fincadas en la paret;
anque a mirar quí las merca...
¿quí bi-há que pague ixe pré?

S’ha zarráu la serrería,
lo camping, ya se zarré,
bienplegáu ye lo turismo
que da triballo a mullés,
y a zagáls, mientras estudian
cómo escaparse dimpués.

Ya no’n somos lo melico
de lo mundo, como ayer,
que i-somos dentro d’un globo,
por culpa de los dinés,
¡Y a rezar!, que no se punche
u se leve bel traspié,
y nos dixe con la bota
pía y sinde caucarré...

LO CANTAIRE DE CIRESA –Marzo 2007-

ONSO D'ORO 1986

A LA MIA MULLER

Si lo sol de los lobos t'espanta,

si te i-mete de punta los pelos,

si no has pro con la luz d'una estrela,

si ye escasa la d'un firmamento,

búscalate dentro,

verás como brila,

y enta fuera saldrá por los güellos,

y astí seré yo

pa cantarte u contarte bel cuento,

pa ferte arrier,

tirarte lo miedo

y tornar ixa luz en calor,

y tornar la calor en deseo,

lo deseo en set...

y la set en fuego.

Y buscar en la fuen de lo cuerpo

l'augua fresca y pura

que apague ixe fuego.

y, aplanando la nuey con los pies,

ya no habrás mas miedo...

Plegará l'aurora

y vendrá lo suenio.

Dixarás la cabeza, cansada,

en lo mío güembro.

Y, mientras t'aduermes,

mientras yo te veilo,

soniaré remerando ixos ratos

en que i-só tan lexos.

Ixos días vacíos de vida

qu'escribindo empleno,

p'haberte mas cerca;

ixas nueys de crebarme los sesos,

en beroyos versos

y que, amás de medíus y rimáus,

sigan estáus chesos.

Pero allora i-seremos ya chuntos

y no habré qu'escribir mas que besos,

y la vida será poesía

pa lierla con los sentimientos.

Entre tanto, que te faga goyo

lo que agora con aimor te i-meto:

Así que i-plega la nuey,

empecipio a prexinar

y en l'alma se torna ley

y no dixa de chilar

lo goyo d'estar con tú.

Esti maitín he liíu

una idea que, de días,

d'entender tiempo no he habíu,

y que diz, pa que t'arrias:

"Lo querer, en la muller,

emplena la suya historia,

y en l'hombre, diz, que no ye

mas que cosa transitoria".

¿Tamién lo prexinas tú?

Muito goyo me faría

qu'en esta nuey me salise

lo que t'aimo cada día

y lo peito lo escribise

en un soneto políu:

¡Qué luengas son las horas!, tan escuras,

¡cómo brila lo espritu! y no te trova,

y los güellos, zarráus, te furtan l'alma

y la trayen t'astí, como dinguna.

¡Qué limpia ibi-é, que plena de ternura!...

¡Dentra'nta mí!, la mía te fa alcoba

y te rodía con prisas sin calma,

y t'apreta, y de dos ne fa una.

Pero las manos bi-son tan vacías...

Ploran por ixe pelello de seda

a qui, amonico, li fan morisquetas.

Y, a l'aire, ven y lo besan...

y l'amargor de la nada lis queda.

Pero no reblez, que bi-há muitos días.

Muller que m'escuitas,

fete cargo, que pleven ta l'cielo

las glarimas secas

que mullan lo cuerpo

salindo de l'alma...

Y anque ascape tornemos a viernos

y esta set que m'empuxa se i-seque,

y anque siga estáu malo est'ibierno,

por lo frío que plega enta l'alma

y lo chelo que dixa en lo peito,

en la primavera,

-luengo ye febrero-

la calor y la luz de l'aimor

implen lo celebro,

y, en do bi-heba boira,

-malos pensamientos-

se columbra agora,

dimpués d'ixe tiempo,

que lo tuyo y mío

ye un aimar eterno.

Si lo líen otris,

que vergüena no t'en de saberlo,

pos, dimpués de todo,

en lo mundo entero,

güena falta nos fa lo cariño.

Por si alcaso valese d'exemplo,

mando esti triballo

enta la Val d'Echo,

pa que lo me lían

los que fablan cheso.

Chuan Chusé Lagraba Miguel

Primavera de 1986.